絲絲聽聞美國硅谷出咗一名靚女家政女王，年紀輕輕就為自家創意生活網站Brit + Co.集資近630萬美元（約4,910萬港元），就連同樣係靚女嘅雅虎行政總裁邁耶都有份注資，佢就係曾任職Apple公司同Google嘅Brit Morin嘞！
呢位被喻為硅谷Martha Stewart（美國著名家政女王）嘅Morin，今年只係27歲，兩年前離開工作四年嘅Google之後，創辦個人網站，分享DIY嘅生活玩意同創意料理食譜。網站除咗教人DIY之外，Morin仲會將自己嘅製成品同工具放上網站賣，實行公諸同好兼開拓電子商機！
投資者之一嘅Oak Investment Partners雖然深明創立個人品牌，會面對更多挑戰，但睇見Morin對DIY手藝充滿熱誠，加上佢又有Google同硅谷嘅IT經驗同背景優勢，相信公司好有升值嘅潛質咁話！
Morin自言細細個仲未有Google同YouTube嘅年代，已經好鍾意做家居同時尚手作仔，依家可以話係實現兒時夢想。家吓佢仲做埋自己品牌嘅生招牌，係網站唔難睇到佢示範嘅模特兒相，閒時佢仲會寫專欄同上電視節目，曝光率十足，同名人無分別！而私底下Morin一一年就同社交網站Path嘅創辦人之一Dave Morin結婚，工作愛情兩得意，絲絲覺得Morin唔單止係硅谷嘅家政女王，簡直係女人嘅奮鬥目標啊！