美資投行Jefferies Group三年前嚟香港開檔，請咗Grant Williams做Equity Trading Asia嗰阿頭，點知坐唔夠五個月，就因為一條惡搞希特拉短片，畀人炒咗。因為呢條片，Jefferies仲分分鐘要拎1,300萬出嚟！
Williams一○年七月加入Jefferies，負責出啲生鬼嘅每日通訊畀大概900個客，通訊出街前要先傳去紐約同倫敦一轉，畀當地兩個高層睇睇，先可以電郵畀客。
出事嗰日係十二月七日，冇錯，日本就喺一九四一年嘅當日偷襲珍珠港，Williams借題發揮，佢仲喺通訊裏面link咗一段輯自《希特拉的最後十二夜》嘅短片，原片先前被網民配上唔同字幕，已有多個唔同嘅惡搞版本，今次嘅係將摩通主席Jamie Dimon惡搞做希特拉，講佢押注白銀。
呢份通訊當日如常經電郵先傳去畀紐約同倫敦嘅兩位高層，唔知點解未經審核就出咗街，公司唔夠21個鐘頭內沒收Williams部Blackberry，拿拿聲炒咗佢。
Williams唔忿氣，入稟高院告公司亂咁炒人，要求公司至少賠番1,300萬畀佢。結果判Williams贏，法官話件事係公司系統加埋人為錯誤，唔關Williams事，仲話班高層慌死得罪Jamie Dimon，係反應過敏添。