曾經係台灣股王嘅鴻海集團自九一年招股上市以來，除咗配售過一次新股，便從未向小股東伸手拿錢，但鴻海股價至○七年高位後，近年風光不再，董事長郭台銘昨日喺股東會上為股價低迷，向股東鞠躬道歉，佢誇下海口，未來鴻海股價會隨年齡而增長。
有鴻海資深股東之稱嘅阿土伯話，「買鴻海股份，就係買郭台銘三個字」，希望郭董加股息0.5元新台幣，唔知係咪阿土伯說話感動咗郭董，佢即時話加派息可以喺臨時動議中提出。提到鴻海股價咁低迷，郭董完全無抱怨老拍檔蘋果公司撤單嘅事，只係將責任歸咎於聯儲局阿伯南克退市，搞到外資瘋狂出逃，但佢相信鴻海股價好抵，離最低位應該不遠。
絲絲知道郭台銘三個字一向值錢，但無想過小股東亦因此買入鴻海，近日郭董話佢個「郭」字可以倒轉寫，何解？原來3D打印技術喺郭董眼中只係噱頭。
郭台銘仲話，3D打印唔等於第三次工業革命，因為呢個技術冇乜商業價值。佢以電話為例，話3D打印機可以「印」到電話，但就「睇得唔用得」，而且又唔可以「印」有電子元件嘅產品，對電子產品嘅生產冇幫助喎！
余詩韻