Market Insight：航運股等國策打救

再睇埋沽空佔大市成交比例高企13.1%，淡友似乎仲係咬住唔放。六月期指今日結算，後日輪到基金半年結，六月份由頭隊到尾，基金經理粉飾窗櫥誘因唔少，估計短期大市仲係較大機會彈返上20,700至20,950點之間。

李總理上任百日，師承朱鎔基一上場雷厲風行，推出整頓金融、擠壓經濟泡沫的鐵腕政策，目的路人皆見，推動中國經濟結構調整，唔再走以往粗放型低效益經濟的舊路。到底對濫借銀行業小懲大戒，上星期四將人民幣拆息挾上13.44厘歷史新高，引發股市崩塌，究竟有冇收到預期效果？坊間意見各佔一半，但可肯定，錢荒即使暫時平息。

古勝冇點你 2013/06/27

萬里長空

但滙豐中國編制的六月PMI跌到48.3，如領導人腰骨夠硬堅持唔走4萬億元救市舊路，下半年經濟保住7.5%的可能性或低過一半，投資市場會點解讀，反彈之後又會否繼續陰陰乾？是古勝所擔心的現實。

內銀股短線見底

股票只要夠平，永遠都吸引到手上有彈藥的投資者去博反彈。昨日個市勁升482點，單係三大藍籌內銀已貢獻182點，佔大市升幅三成八。以前日收市價計，三隻內銀股平均跌到撥備前收入3倍及0.8倍市帳率，稍稍低過一二年九月及一一年十月，兩次市場憂慮中國經濟將出現硬着陸的低位。昨日工行（01398）、建行（00939）及中行（03988）分別上升6.8%、6.5%及3.3%，進一步確認在下認為短期內銀股股價已於上周至本周初之間見底的可能性。

翠華控股（01314）公布截至三月底止全年純利1.3億元，增長24.7%，以一隻市盈率近40倍的餐飲股，業績有些少差池都唔掂！公布業績後公司解釋係上市前增開新餐廳產生初始勞工成本及物業租金開支所致，兩者期內均高於同期收入增長。

德銀出報告叫客戶沽售，同時降今明兩財年盈利預測12.7至13.2%，目標價睇3.3元，搞到翠華昨股價逆市隊低6%見4.5元，嚇親捧場客。不過，份業績仲係令經常幫襯的古勝有些少擔心，到底掌舵人將來想討好班中環賓架？抑或一班食客？個人感受，佢上市之後食物質素真係比唔上以前。

從內銀股反彈，可見整個中資板塊根本就係睇住中央政策搵食。昨日內地傳媒報道，中央研究支持航運業發展相關措施，考慮到航運業持續低迷，發改委及交通部牽頭計劃下半年正式上報國務院，消息指，計劃包括調整運力結構、加大資金力度、協助淘汰舊船以及減免船公司及海員的稅項等等。

中遠已先行喘定

或者市面上太多落後股關係，昨日航運股反彈力度唔算特別勁，中國遠洋（01919）上升1.9%、中海集運（02866）升2.6%，碼頭股仲好些少，中遠太平洋（01199）及招商局國際（00144）都有4.8%及5.8%進帳。

當中，今年中遠積極出售資產套現，試圖抵銷主營航運業務虧蝕，早前大摩估中遠今年好有機會虧轉盈。睇番整個六月份中資股跌到一仆一碌，老早跌定的中遠，由月初3.34元到昨日收報3.22元，反而算跌得少。雖然靠變賣家當唔係長遠之法，但如果有扶持政策出台，先止住咳留住班小股東未嘗不可，睇嚟3元左右已經見底，細細注可以諗吓佢。

炒波幅小注為宜

中央藉着今次「水荒」整頓內銀業，由於內銀業與實體經濟關係密切，傳統經濟難免受到影響，即使後市回穩，相信亦要一段時間整固。短期策略只宜候震盪出現，始從超跌股中尋找博反彈機會，國策支持未有動搖的新興產業值得留意。

年內4G發牌憧憬未有減退，雖然電訊設備股整體走勢轉弱，但仍有一定波幅可供炒作，典型例子有TCL通訊（02618），股價由前日低位2.95元反彈上昨日高位3.7元，高低波幅有25%，捉正低位進場短炒回報都唔錯！但補充一句，依家股市風高浪急，睇準低位博反彈只宜小注一試，須嚴守止蝕。

古勝