絲絲講場：花旗三千義工無懼打風
成日聽人話貴人出門招風雨，咁啱花旗班義工，喺「全球義工日」出動嘅時候撞正三號波，好彩最後天公作美，花旗銀行環球個人銀行服務總經理林鈺華（Christine）仲可以同老公一齊做義工，真係sweet sweet！
雖然嗰日打風，但亦無損花旗三千位義工嘅愛心，其中Christine就去咗香港仔一間復康中心探訪。之後大家兵分兩路，有啲幫手打掃，有啲就同復康人士一齊煮嘢食。
林鈺華下廚冧老公
過咗一陣後，絲絲喺好遠就已經聞到香味，原來係Christine煮咗啲蛋花湯同埋麵條。唔講唔知，原來今次係Christine老公第一次試佢手勢，絲絲見佢老公個冧樣，就知啲嘢食梗係好好味喇！
其實花旗今次做義工嘅同事好國際化，好似嗰日就嚟咗位澳洲嘅同事，當大家食完麵條後，絲絲見到位老友記對佢好有興趣，於是Christine就上前充當翻譯，見佢哋仲傾得好開心呢。
余詩韻