倫敦金屬交易所（LME）行政總裁Martin Abbott早排宣布唔撈，但就會做到今年底，適逢港交所（00388）尋日舉行上市13周年酒會，同LME亞洲年會，辭咗職嘅Abbott都要飛嚟香港出席畀面派對。大家梗係有追問佢為乜要劈炮啦！係咪因為之前收咗一大筆極度「和味」嘅獎勵，所以先至會決定收山，好好咁享受人生？
Abbott話自己唔係打算退休，佢仍然會工作，但依家就未有具體計劃。咁又係，佢今年先52歲，距離港交所嘅60歲退休年齡仲有漫長歲月！佢話自己係由港交所宣布收購LME開始，18個月後至會離職，完成晒合併同過渡工作。
但原本坐埋同一條船，佢突然間「跳船」，始終難免令人懷疑，係咪佢對港交所收購LME後冇信心，又或者覺得港交所低估咗LME進軍中國市場嘅難度？佢就例牌地否認，仲話對LME嘅前景好有信心。至於大家同唔同意佢嘅講法，就見仁見智喇！
佢早前因為有份促成LME出售，透過長期計劃獲得736萬英鎊，即係約8,700多萬港元。雖然未扣稅，但計絲絲話，都可以有排歎啦！
余詩韻