玖龍紙業（02689）好多員工都話，董事長張茵個樣好有福相，成日見佢同老公，叫飯堂送飯菜去辦公室，邊傾公事，邊撐枱腳，好sweet。點知尋日無啦啦畀人寫佢哋已經離咗婚，咁大件事，佢哋即刻出聲明澄清冇咁嘅事，好彩佢哋澄清得快，呢排內地好多「空軍」，容乜易畀人用嚟做藉口，沽到個股價殘。
離婚消息喺尋日朝早傳出，公司喺中午12時25分，即刻出澄清聲明，話董事會注意到近日若干報道，話公司董事長張茵同佢丈夫，執行董事長兼行政總裁劉名中經已離婚。公司就呢件事已諮詢張茵同劉名中，指報道係錯誤同完全不正確，同埋對佢哋婚姻嘅評論並冇事實根據及嚴重失實。
市值216億元嘅玖紙，尋日股價跌1.9%。市場咁關注呢件事，係因為舊年內地地產界女首富，龍湖地產（00960）主席吳亞軍同丈夫離婚，一度影響投資者信心，股價都有壓力。所以，既然係流料，就梗係快速否認喇。
張茵同丈夫劉名中結婚已經超過20年，劉名中平日較少露面，認識張茵之前係一名牙醫。雖然外界睇落張茵名氣大啲，○六年登上胡潤百富榜榜首，以270億元人民幣成為中國第一位女首富，不過張茵就講過佢同老公工作上只係分工唔同，丈夫負責企業發展同技術改造，而佢就負責整體營運管理，但無分高低。
余詩韻