期指觀瀾：轉勢之前按兵不動
昨日筆者先話同個跌市鬥長命，好嘅唔靈，昨日期指開市不久已隊穿19,975點訂下的止蝕位，十一點前，仲要三次彈上去畀淡友壓住落番嚟，搞到唔投降都唔得。
恒指昨日下跌449點收報19,813點，主板成交774億元，沽空佔成交比例繼續高企，維持在13.57%，是連續五日雙位數，即月期指午後由即市低位19,706點彈番上去19,798點收市，論幅度，只及全日波幅19,705至20,073點的0.236反彈，即19,792點高些少，揭示即市好友反撲力度之弱。
港股昨日的跌勢，真係要多得股災一樣的A股，滬綜指以近全日低位1,963點報收，跌109點，與去年十二月起步位1,949點只係差9點，人行無放水舉動，將無法紓緩市場對內地半年結前水緊的疑慮，昨日人民幣一年期不交收合約跌至6.3170的三個月低位，情況確是恐怖。
恒指昨日低位19,756點，已經跌穿23,944至21,423點，首波跌浪的1.618跌幅，即19,864點，短短一個多月，論跌幅及跌勢真係誇張。截至昨晚十時，夜期低水幅度擴大至逾200點。兩星期內，兩次博反彈均損手，筆者都係決定唔做烈士，等明顯轉勢訊號確認至算。
John Mullen