Market Insight：水緊持續 問題嚴重
昨日滬綜指大成交下狂插5.3%，創下○九年八月以來單日最大跌幅，深成指就更誇張，一跌就6.7%。雖然上星期缸邊盛傳人行向同業市場拆出資金，內地拆息市場由歷史新高回落，隔夜及一星期息口，昨日落番2厘及1.23厘去到6.48厘及7.31厘。
從來資金緊張，股市難免會神經緊張，水緊的情況也開始波及內地一級債券市場，今日國家開發銀行原訂發行200億人仔，三至十年期債券的計劃，昨日事先張揚會因為事故取消。
近期有陰謀論認為，今次是人行刻意懲戒借貸欠缺謹慎的銀行，配合新一屆領導人，為經濟增長打假，以陣痛來避免經濟泡沫化的風險，所以先遲遲唔作出流動性管理的相應舉動，例如減存款準備金率及大幅注入流動性的舉動。
空軍尚未放軟手腳
上星期初，這論調查實仲說得過去，但連國開行發債都要出事，加埋昨日多間大行銷售部的即市簡訊，都話外資基金清一色從A股套現，全日有沽無買，A股才出現股災式的急挫，指數直奔一一年低位。造成股債市動盪，經濟不穩，今次「受罰的人」未免太多，也更加令人擔心今次半年結前水緊，同以往銀行半年結閂水喉等埋數咁簡單，如果今個星期水緊情況無改善，都咪話唔得人驚會有大大鑊的問題跟尾。
A股股災，港股終於守唔住兩萬點關口，恒指跌449點收報19,813點，沽空佔大市成交比例13.57%，是連續第五日高於一成，指數基金盈富（02800）繼續成為空軍套戥目標，全日12.5億元沽空佔成交六成八，排首位，154隻股票創52周新低，836隻股票跌穿250日線，多過仲企響250日線樓上嘅737隻，意味過去一年才入市的投資者，過半數坐緊艇。
五十大成交榜中，得長實（00001）及恒大地產（03333）兩隻唔使跌，留意到唔少基金重倉的二三線，或者今年的outperformer都出現洗倉，濠賭股已連隊幾日，昨日保利協鑫（03800）、比亞迪（01211）、金山軟件（03888）、創維數碼（00751）、民行（01988）被沽得極狠，國指及恒指都創咗今年新低，反而兩隻內銀工行（01398）及建行（00939）未跌穿上周五低位，唔通真係還原基本步，搵番兩隻內銀股做資金避難所？
古勝一直認為，近年祖國人最豪，並唔係掃起法國佬的「八字貼牌」拉菲紅酒，或者山西煤礦老板開法拉利去巡礦粗用，最豪仲係要訂造一個全世界獨有無共用硬件的TD流動電訊網絡，中移（00941）呢項任務將正式進入新階段，落實為網絡升級到4G，七月中開始，為TD-LTE的網絡全國20.7萬個基站公開開標，內地估累計資本開支會超過1,800億元人民幣，由今年中移股價一浪低於一浪表現，多少反映賓架睇法，埋單應該唔止呢條數。
富士康料沖喜有限
智能手機代工王富士康（02038）收市後發盈喜，預告今年六月底止未經審核半年業績會錄得溢利，意味與去年同期或者去年全年2.24億及3.16億美元淨虧損比較，業績由紅字變番黑字。
理由係產能及經營效率提高，以及毛利率改善所致，昨日股價跌6.7%報3.77元，今年計股價無升跌，但就跑贏恒指一大截。綜合大行估全年賺1,873萬美元，以一間預期收入60億美元的公司，市盈率97倍無乜意思，事關估錯機會高，八月份業績曝光前，或有一陣蜜月期。
非常時期少做少錯
執筆時，在下已收到唔少股友飛鴿傳書，話被呢期股市跌勢嚇到心慌慌，昨日在暗盤市場率先沽出iBond3（04218），袋袋平安定下驚咁話，但繼而下一句就問，套現之後，有冇咩好買？又要驚、但冇貨喺手又要心思思落場，典型賭仔性格！
講番iBond3，近月大市反覆尋底，連高息股同公用股都要捱沽，成功認購iBond3，沽貨有錢賺多多少少都唔係壞事。至於話套現有咩好做，除非真係好唔等錢用，而且可以持貨一段較長時間，否則在如今的非常時期，短線入市博反彈風險高，自問並非「藝高人膽大」一族，都係一動不如一靜為妙。
古勝