政府對何謂中產，條線set得好低，絲絲唔識睇法國片，鍾意港式奶茶多過咖啡，究竟絲絲算唔算中產，真係困擾咗好耐，好彩信悅理財做咗個相關調查，可以參考吓。三成受訪者認為月入需達五萬或以上，至可以躋身中產之列，呢條界線比政府嗰條合理好多！
調查喺今年四月進行，成功訪問778名受訪者，有近9成受訪者年齡介乎26至59歲，同時更有4成係專業人士或位居主管/經理級別。調查結果發現四分一受訪者認為月入達三萬就係中產、兩成認為要四萬、三成話要五萬至係中產。
有啲人會用唔同方式，去分辨邊啲係中產，除咗入息之外，有啲會用職位行業，有啲又會用生活文化嚟分，不過，調查發現大家都係「向錢看」，67%受訪者以經濟收入界定中產，21%受訪者以職位行業來劃分，以社交圈子、文化興趣或生活習慣來界定嘅只屬少數。
今年首季香港嘅家庭住戶每月入息中位數為2.2萬元，個人每月就業收入中位數則為1.2萬元。雖然中產五萬蚊收入好似好多咁，之不過，香港物價指數高企，通脹連年攀升，其實計落生活都唔係好豐足o架。
余詩韻