絲絲講場：花旗三條「一」行善兼慶祝
如果要數最鍾意做義工嘅機構，相信一定唔少得花旗集團嗰份，事關佢哋第八屆嘅全球義工日喺六月二十二日舉行，花旗集團香港及澳門區行長盧韋柏（Weber）仲同絲絲講，到時會帶埋囡囡一齊做義工。
其實佢哋今年主題都好特別，Weber話入面嘅「One Team、One Goal、One Community」三條「一」，除咗寓意佢哋係Number One，仲係慶祝集團今年喺香港成立111年。
至於有咩義工活動，Weber話有長者探訪、環境保育等18項社區活動，佢估計今年應該有3,000名員工參加，而佢自己亦會帶埋兩歲嘅囡囡，喺北角一齊整曲奇，送畀基層小朋友，向囡囡教育回饋社會嘅概念。
客戶可捐碌卡積分
更重要嘅係，如果有用開花旗銀行嘅信用卡，客戶可以用九折嘅積分折扣，將積分兌換成善款捐畀東華三院。原來碌卡都可以做善事，睇嚟絲絲都係快啲出番張卡先！