絲絲講場：致富助客「加Fund」增值
近排港股跌多過升，本地證券行啲佣金收入都縮水唔少，弱市中想發圍，就要不斷創新、增值。絲絲收到風，致富集團尋日就同加拿大資產管理公司Dundee Corp簽署咗個合作意向，初步計劃一齊發起互惠基金、能源基金等，希望通過開拓基金、資產管理業務，增加高端客源。
周小川徒弟坐鎮北京
其實近年致富發展相當進取，現時公司喺本地已有廿間分行，公司中國部董事葉海亞話，雖然近排冇打算再開分行，不過就有計劃加強內地業務發展。原來除咗喺上海同深圳已有辦事處，致富最近啱啱攞到批文，可以喺北京開新辦事處，公司正忙緊搞裝修，相信好快可以開業。
絲絲聽聞，個北京辦事處已經搵到猛人坐鎮，擔任首席經濟師嘅肇越，唔單止做過中投嘅高級經濟學家，以前喺人民銀行研究所時，仲曾經師從人行行長周小川，從事宏觀經濟同貨幣政策研究，相信由佢執筆發表宏觀經濟走勢嘅報告，絕對有助致富喺內地省靚個招牌。