絲絲講場：寶聯集資用途「保密」
喺垃圾堆搵到個人機密文件嘅事件，都發生過好多次，令大家更關心私隱係咪受保障，從事環境服務供應嘅寶聯（08201），對呢方面好有研究。
寶聯主席范石昌（Allan）話，保密及敏感文件處理呢一門業務，一啲都唔簡單，好多手續同要求都不能忽視，包括連張紙摺到幾細都有規定，而且要用特別機器去處理，全程更需要錄影，等個客可以放心。唔怪之得佢哋上市，部分集資用嚟購買設備，發展保密及敏感文件處理業務。
寶聯提供清潔及廢物處理，都算係人手密集嘅行業，近年實施最低工資對佢哋又有冇影響呢？
工資上升惟有加價
Allan就話，好多人都咁問，不過佢話，好彩客人都肯補番差價，所以對寶聯嚟講，係冇乜影響，依家最低工資加到30蚊，佢就話更加係預計之內，而且已經將上升咗嘅成本完全轉嫁畀客戶！
Allan仲話，其實當年法例實施之後，都有同行「頂爛市」唔加價，不過最終都冇咩好結果，多數都已經因為蝕錢而被淘汰，又或者引起勞資糾紛！