剛過去嘅父親節，對某啲金融界人士可能特別難忘，好似港交所（00388）行政總裁李小加，當日就化身廚神，親自落場炮製千層肉餅、同麵條與家人分享，真係so sweet呢！
平日李小加說話直率，有時得罪咗人都唔知，但返到屋企就完全唔同形象。話說佢今年父親節，慈父上身，仲大玩「煮飯仔」，親自下廚整大餅，足足有三款咁多，包括葱油、芝麻同千層肉餅，而且仲整埋麵條添，真係犀利！唔講唔知，佢原來對北方人喜愛食嘅餃子特別鍾情，要添食呢。
下個禮拜港交所有兩壇盛事，星期一就係上市13周年酒會，周二就輪到更大陣仗嘅倫敦金屬交易所（LME）年會，李小加好有信心本港發展商品一定會成功。佢將倫敦、香港同內地比喻為「三條腿」，缺一不可。收購LME就好似買種子回來，肥田料就係內地嘅流通量，種子就喺香港種植。講到呢度，咁深入淺出，大家都應該好明白佢點解係都要收購LME。
LME依家有好多計劃，好似今年底就會成立交易資料儲存庫，金融海嘯後監管機構都規定經紀要將場外交易匯報，LME做埋交易資料儲存庫，一來可以方便會員，二來不需額外成本。至於香港幾時可推商品合約，佢就話肯定唔會同倫敦重複，並且會先推現金結算嘅產品。