期指觀瀾：空軍肆虐睇定再算
個市等聯儲局主席伯南克議息後開金口，不過，近期比外圍快半拍的港股，已率先「跌定先」，懶理隔晚華爾街三大指數大升，恒指昨日失守21,000點關，跌238點報20,986點，即月期指收報20,938點，低水48點，成交反彈至7.43萬張，主板成交僅618億元，可謂無乜瞄頭。
但沽空由前日65億元升至82億元，沽空佔成交比例升至13.25%，是超過一年新高，盈富基金（02800）沽空達12.09億元，沽空比率97.1%。說穿了，部分受基金章程所限唔玩得衍生工具的基金，怕跌又要賭，選擇透過沽空盈富為手上股票對沖所致。
昨日話想跑轉短線博國期反彈，點知朝早穿9,625點之後倒水一樣，睇番今轉恒指由20,652點低位反彈上21,272點見頂，都算係補番21,069至21,307點的下跌裂口近85%，反之國指真係弱到離晒譜，9,522彈上9,820點已止步，只能回補上周9,771至9,927點的下跌裂口大約31%。
上海同業拆息昨日勁升，加上匯金上周托市的消息被消化，已放棄博反彈念頭近三個星期以來的筆者，決定睇多日，等睇埋國指能唔能夠頂得住9,522點，唔再破底至諗下一步點做。
John Mullen