Market Insight：保留現金 等執平貨

近期港股有領先外圍股市的情況，隔晚道指升138點，恒指卻未受刺激，昨日早市高開後隨即掉頭，恒指最低見過20,896點，跌328點，埋單跌幅略為收窄，收報20,986點跌238點，主板成交618億元唔算多，不過空軍相當活躍，沽空佔成交比例升上一年新高，去到13.25%，盈富基金（02800）沽空比例急升至九成七，其次係恒生H股ETF（02828）的八成二。大孖沙以沽空指數基金作為對沖工具，為伯老會後聲明可能引起的市場震盪先打定底。

內地水緊仍在惡化

古勝冇點你

萬里長空

種種蛛絲馬迹顯示，後市確係有山雨欲來之勢，較明顯是，愈來愈多分析員調低中國經濟增長預測，同時提高硬着陸的風險系數。昨日輪到滙豐經經濟師簡世勛，將今明兩年經濟增長預測由8.2及8.4%，下調到7.4%。美銀美林話31%基金經理睇未來十二個月中國經濟增長疲弱，係一一年十月以來最淡。

再者，內地水緊情況惡化，昨日隔夜及一星期上海銀行同業拆息，去到7.66厘及8.07厘，比前日急升2.06厘及1.37厘。賓架界傳四大國有銀行催促人行減存備金率兼泵水，以解燃眉之急，可惜不得要領。

到底上述教人不安的消息，有幾多成已經在A股弱勢上反映？可謂見仁見智，如果係技術走勢信徒，滬綜指今年二月在2,444點見頂撻落2,161點，五月反彈去到2,334點又再行人止步，剛剛過唔到0.618反彈阻力線2,336點，之後輾轉下滑，到公布打假後得番1%的出口增長，滬綜指連上次低位2,161點都守唔住，走勢差無可差。假如大行估計六月尾、七月初先係最水緊時間的話，短期對看淡股市一方相對有利。

合生元已不宜高追

市況如斯，估計唔少專欄會建議睇番啲高息、公用甚至REITs等避險資產。不過，今次同以往股市調整不盡相同，內地經濟唔多掂之外，仲挾埋美國退市的風險，事實上，經過美國超過三年QE，唔少基金及大孖沙都有過度槓桿情況，單係睇見班私人銀行大客，衰完「I kill you later」無耐，近年相當興透過借平錢賭遠期公司債，狼起上嚟可以今日認購聽日食胡。

自從踏入六月，全球股、債、商品及外匯統統都跌，資金唔係傳統想法「棄債投股」咁簡單，似乎為退市去槓桿化做準備，刻下最理想避險方法，可能係減低入市注碼，保留較多現金等掃平貨機會來臨，假如買開一萬，揸住三、四千蚊靚貨已經夠晒皮。

蒙牛乳業（02319）以每股3.5元買起雅士利（01230），估唔到套息客可以掃到雅士利上去3.46元（收3.43元），得返溫巴仙多些少，講到尾，中糧系收歸己用之後，已經係半隻國企，在內地路路暢通，買嘢十拿十穩，短短幾個月先係現代牧業（01117），又引入法資達能搞乳酪，再吞埋嬰兒奶粉雅士利，掌舵人野心是路人皆見。口痕友話四月發的一批股票獎勵計劃，確係夠晒激勵士氣！難怪蒙牛昨日股價仲升得多過被收購的雅士利。

有趣是，連隻專代理高價奶粉的同業合生元（01112）都炒埋上去，勁升6.7%見46元，差2元又返回52周高位，但既然古勝一心想減減磅（倉同體重亦然），往績30倍PE實在搶唔落，惟有繼續做塘邊鶴，戥班奶粉黨高興。

強勢板塊紛紛見頂

昨日跌市，見到部分手機相關股份沽壓頗大，如舜宇光學（02382）跌12%、摩比發展（00947）跌8%、巨騰（03336）跌13%、信利國際（00732）及A8電媒（00800）分別跌5%及3%。次季呢類股持續強勢，但近期紛紛見頂回落，又見唔到有其他新嘅板塊接力當炒，炒家少咗個避險樂園唔在講，也許亦顯示跌市已進入另一階段。黎明前嘅黑暗往往係最難頂，唔想浪費銀彈，惟今之計係暫時抽身離場！

古勝