手機係用嚟「篤」，而唔係「講」嘅！睇埋WhatsApp公布嘅最新數據，大家一定唔反對呢個形容，作為IM通訊軟件巨頭嘅WhatsApp透露，系統喺24小時內為全球用戶傳送超過270億條即時訊息，破晒紀錄，數目足足等於全球70億人口嘅3.8倍。難怪唔少傳統電訊商，都話IM軟件嘅興起，為電訊商嘅盈利模式帶來極大挑戰！
WhatsApp嘅用戶已超越約有2億用戶嘅Twitter，絲絲睇返資料，原來喺一一年十月，佢哋單日處理10億訊息，依家已經去到超過270億條，兩年唔夠就升咗27倍有多，增長認真驚人，印證咗佢哋嘅宗旨：「專注以小就是美邏輯、提升產品競爭力」嘅發展之道。
喺另一邊廂嘅電訊商，見到呢個數字真係激死，以往佢哋嘅SMS收入好重要，依家個個用免費服務，電訊商唔見一截，惟有度橋增加生意。
中移（00941）同聯通（00762）就喺香港大搞「一卡兩號」，其中以MVNO租網方式在港營運嘅聯通，尋日仲開展「上台送機票或請食本港五星酒店Buffet」嘅新招搶客，最有噱頭嘅係七月中前申請指定月費計劃新客，可獲贈一張來回台北機票，優惠講明不包燃油及稅項雜費，睇落都好吸引喎！
余絲韻