絲絲講場：瑞銀「輪后」添丁報喜
輪場喜事多，繼法巴上市衍生產品部前聯席董事趙海珠喺今年年頭誕下龍仔後，另一「輪后」、瑞銀亞洲股票衍生產品銷售部執行董事李靄欣（Anita）都有喜訊，就係預計喺八月底、九月初誕下第二個仔仔。即係話佢依家兩歲零八個月大嘅大仔，就快有個伴喇，可喜可賀。
有咗唔及冧市震撼
通常有咗BB，媽媽嘅生活習慣都會有好大改變，Anita可能有第一胎嘅經驗，同埋平時佢一向都好注意飲食，中西醫話有乜嘢唔食得都已經記到實一實，所以佢話飲食嘅轉變唔大。
依家佢早餐會食燕麥粒，因為維他命B雜有助BB快高長大；至於午餐就會食兩份菜、一份肉，同盡量唔食飯麵等碳水化合物，話可以令自己下午做嘢時精神集中啲。
其實，Anita弄璋喜事都收得幾密，絲絲都係尋日聽到佢同事Johnny（于正人）講先知，而Anita亦冇喺自己嘅面書上公布喜訊。佢解釋都係平常心啦，又笑言之前知道有第二胎嘅驚喜程度，竟然不及尋日港股突然急挫嘅震撼！至於會否再追第三個，佢就話暫時未有計劃。Anita放產假在即，難怪尋日Johnny都呻今年冇得放暑假啦！