港交所（00388）今個月下旬會搞場大龍鳳，即係倫敦金屬交易所（LME）年會首次移師香港舉行，LME晚宴仲係年會嘅重頭戲添，好大陣仗o架，將筵開80席，邀請嘉賓達800人。聽聞晚宴入場券「一票難求」，「撲飛」緊張過演唱會，有錢都未必買到。晚宴主要由LME會員買枱，然後請佢哋啲客出席，講得白啲，即係有face（面子）至有得去。
講到咁誇張，當晚嘅dress code亦有嚴格規定，要秉承倫敦將晚宴又稱為black tie dinner嘅傳統，各人要穿着晚禮服赴宴，不過，民族服裝都可以。咁今次會唔會好多人穿着唐裝衫或者旗袍？
為咗LME年會造勢，希望年會搞得好好睇睇，商品市場發展順順利利，證明港交所冇買錯嘢，行政總裁李小加近排頻頻寫blog，內容都同LME有關，絲絲計過數，由五月下旬到依家，短短18日內就寫咗4篇，生產量直逼專欄作家！
尋日小加最新嗰篇blog又激讚LME，話五月份LME合約成交張數又打破上月至創下嘅歷史紀錄，其中鋁成交量按年升7%、銅升10%。