估值太低 大計暫緩
邊間咁搞鬼呀？之唔係中國餐飲集團俏江南，佢嘅創辦人兼董事長張蘭日前就話，因為港股，尤其係同中餐有關嘅股份，依家估值太低，所以會暫緩上市計劃。佢仲話，會等到港股市場回暖，同埋對中餐股份估值提高之後，先至再考慮嚟香港上市。
俏江南上市過程其實都幾曲折，佢哋原本計劃喺A股上市，但舊年一月就出現咗喺中證監披露嘅終止審查企業名單之中，A股上市失敗。之後佢哋就轉戰香港，市傳佢哋已經通過上市聆訊，集資額1億至2億美元，較之前嘅3億至4億美元縮咗接近一半。
雖然張蘭話唔上住，但上個禮拜《北京商報》就引述佢哋副總裁杜薇話，有望喺今年完成H股上市。咁即係點呀？