近期絲絲發現有唔少匿名信或者舉報信，好似早前中糧包裝（00906）就畀人話涉嫌造假帳，雖然公司一早出咗澄清，但管理層尋日出席完股東會之後同絲絲講番件事時，仍然仲好鬼嬲，佢哋振振有詞咁重申公司光明磊落，又具透明度，更話造謠者手法陰險，不諱言同佢當面對質！
早前有人舉報中糧包裝涉嫌利用收購昆山曼氏包裝造假買賣合同，令現金流上升，為舊年配股鋪路。董事總經理張新直斥舉報者嘅指控無事實根據，強調未曾收購過昆山曼氏包裝，而所有來往交易亦已經過審計。
雖然暫時未知係咩人所為，而對方亦都無接觸過公司，只係冒充投資者及會計師人員，不過公司依家已經委託律師調查，唔排除係競爭對手所為。
張總大嘆短期會影響到公司嘅聲譽，再一次重申公司行得正企得正，亦唔怕當面對質，張總仲話喺股東會上，無一個股東擔心或者問過相關嘅事，反而股東最關心公司經營情況、未來發展。
公司首四個月按年有增長，符合預期，未來希望拓展業務至東盟貿易區，所以喺廣西南寧建廠就係為應付日後發展。