絲絲講場：沙特王子打官司「追身家」
早排《福布斯》公布咗最新嘅全球富豪排名榜中，有「中東股神」稱號嘅沙特阿拉伯王子阿勒瓦利德（Prince Alwaleed bin Talal），就以200億美元（約1,560億港元）排行第26位！不過，呢個消息當時令到王子非常之不滿，並一度同《福布斯》互斥不是，尋日王子終於出擊，專登入稟英國法院告《福布斯》出版人同埋兩個記者誹謗。據英國主要報章報道，王子指摘《福布斯》低估咗佢近100億美元（約780億港元）身家！令佢名譽受損！
財富被低估損名譽
阿勒瓦利德除咗投資酒店同埋傳媒之外，近年佢鍾情於IT公司，喺蘋果公司、Facebook同埋Twitter都有唔少嘅投資。佢話《福布斯》今年嘅全球富豪榜排名報道唔準確、對中東投資者同埋金融機構持有偏見！自己明明有成296億美元（約2,308億港元）身家，但《福布斯》就計少咗成96億美元，搞到佢做唔到十大富豪！
入稟告《福布斯》誹謗
佢仲話，《福布斯》今次嘅錯失唔單止令到佢名譽受損，就連佢嘅投資旗艦公司Kingdom Holding Co.都受到拖累，蒙受損失咁話。
據絲絲了解，喺早排英國啱啱修改咗誹謗法案，絲絲相信王子係諗住如果由英國法院審理呢單誹謗案件，喺新法例之下，自己獲判勝訴嘅機會較高，有利迫使《福布斯》還自己一個公道吧！
余詩韻