絲絲講場：港航飛傳12萬愛心
香港航空為咗履行社會企業責任嘅一部分，舊年八月開始喺香港航空及香港快運嘅全線航班上啟動「飛傳愛心」籌款計劃，為香港殘疾人奧委會暨傷殘人士體育協會爭取時間同機會，喺機上收集乘客嘅捐贈，話咁快尋日就將首階段籌得約12.5萬元善款，全數贈予香港殘奧會。
善款贊助港殘奧會
香港航空服務總監簡浩賢話明，「飛傳愛心」呢次籌款計劃，力求為本地有需要嘅社會機構出一分力。公司今次好榮幸幫助籌募善款支持香港殘奧會嘅發展，兼幫助殘疾健兒喺運動場上成就夢想。仲話今次所得善款將全數用作香港殘奧會運動員嘅恒常訓練，並推廣殘疾人士體育運動及備戰一六年殘疾人奧運會之用，完全發揮傷健一家嘅精神。
香港航空令唔少空中飛人喺航班上，簡單完成捐款過程，更同時將乘坐旅程嘅層次昇華，體驗隨時隨地幫助他人嘅意義。香港殘奧會義務秘書伍澤連深信，未來協會與香港航空必有更多合作機會，為本地殘疾人運動發展作出共同努力。