絲絲講場：Topshop剛抵港即攻京滬
英國時裝Topshop嘅首間香港店今日終於開幕喇，粉絲們準備好未？如果你錯過咗呢場盛事，都唔緊要嘅，因為Topshop老闆Philip Green尋日話，佢哋準備喺北京同上海開店，依家已經搵緊舖位，一傾掂就會開！絲絲相信，Topshop好快就會落腳內地賺人仔喇。
做大生意靠新興市場
Topshop依家喺全球有440間舖，當中有超過7成係喺英國。而Philip Green上年已經講過話，未來四年希望做大Topshop同Topman嘅生意，動力相信係來自新興市場，所以設定咗香港就係作為開拓大中華地區嘅第一步。
其實好多國際時裝品牌咁，香港都只係一個跳板，最終目標都係內地龐大嘅人仔市場。不過絲絲聽講，Topshop香港店啲衫平均價位要成千蚊，折合人仔都盛惠差唔多800蚊，真係比起其他快速時裝品牌貴一大截，話就話依家內地人收入升咗唔少，但一下子接唔接受到貴成倍嘅時裝，真係要拭目以待喇！