內銀高層大執位嘅音樂椅遊戲差不多完成，睇到大家眼花繚亂，依家都未記得清，邊個係邊間嘅老頂。不過，絲絲覺得至矚目嘅，係開咗股東會嘅內銀，董事重選嘅反對票都好顯眼，雖然全部都通過咗，但呢啲顯著嘅反對票背後嘅含意，就值得深思。
好似啱啱至喺五月底，獲批准出任中國銀行（03988）董事長嘅田國立，喺五月底股東會批准其出任執行董事嘅一項，竟然有9.2%反對票，聽落都幾離奇。
肖鋼因為要出任中證監主席，所以辭退中行董事長個位，由田國立接任。查實田國立有「救火隊隊長」之稱，過往幾次臨危授命，四出幫唔同嘅金融機構解決難題，「救火」經驗豐富。佢曾經喺中信集團、中信銀行（00998）、建行（00939）等機構做過唔同職位嘅工作，照計依家全世界都講求風險管理，佢咁有經驗，應該慶幸搵啱人至真啦。
其實同佢一樣攞到咁多反對票嘅，仲有另一位執董李早航及幾位非執董。唔單只中行，絲絲睇番好幾間銀行嘅股東會投票結果，招行（03968）股東會重選傅育寧出任招行非執董嘅議案，反對票有成12%，另外幾位非執董都有相若嘅反對票。
之但係，近年備受洗黑錢醜聞困擾嘅滙控（00005），其主席范智廉及行政總裁歐智華連任董事嘅議案，投反對票嘅比例竟然只得2%及0.3%。
余詩韻