Market Insight：房託基金等執平貨

內地官民豪飲茅台同五糧液外，近年葡萄酒銷售增長之快，同樣係唔講得笑。近年香港已經成為全球最大紅酒拍賣市場，拍賣會上布根地及波爾多頂級佳釀，幾乎都被操普通話的買家掃起。官方數據話，內地紅酒市場零售額超過460億元人民幣，佔零售及餐飲市場消費一成九，估計到一七年再翻一番去到938億元人民幣。

有趣是同胞在飲紅酒習慣上，極之唔夠愛國，國產葡萄酒佔消費總比例愈來愈低，早兩年統計數字顯示跌到得一成二，內地紅酒質素唔掂？抑或法國酒商真係補貼傾銷？大家應心裏有數。唔少人笑同胞唔識飲紅酒，搵汽水溝，其實唔溝，又真係好多山寨牌子難飲到唔放得入口，仲未計色粉、提子汁再加酒精炮製的假酒。

古勝冇點你

萬里長空

講番個市，美國退市疑雲未消，日股愈跌愈急，港股順理成章繼續尋底，恒指昨日跌216點報22,069點，過去十二個交易日跌了十日，有幾弱勢唔使多講。大市升跌股份比例31對69，是五月二十三日以來最一面倒。

美股較具投資潛力

古勝留意到近期美國的恐慌指數VIX及恒指波幅指數VHSI，都由五月中低位逐步上升，有迹象可能向今年二、四月的兩個高位進發。再睇十年期美債息僅2.13厘，距離2.4厘阻力位有一段距離，只怕退市疑慮未完全醞釀完畢，唔排除後市可能藉美國一兩個極亮麗經濟數據，挾高債息，令股市出現終極一跌。但歷史告訴我們，加息意味經濟已脫離危險期，重上復甦大道，每次加息周期之初，雖然股市震盪難免，但往往是中長線一次難得上車機會。平心而論，在下心目中，目前美國股市又確實比中港兩地較具投資潛力。

日日有洗倉股，昨日輪到DBA電訊（03335），中段一度跌超過五成去到1.4元，中午照例出不明跌因聲明，拗腰收2.03元，仲要跌30.9%，相比兩星期前4.55元，真係三碗水煲埋一碗杰撻撻。搵番SDI睇公司得兩三個基金股東，加埋大股東已揸超過七成五街貨，流通貨源唔多，睇怕又係基金要錢唔要貨所致，始終打到落2蚊仲有錢賺，近期唔少芬佬為沽而沽的事件，總之股價無乜跌過估值又唔平的基金股，都係少揸為妙。

領匯（00823）截至三月底止年度可分派收入33.49億元，升14.6%，每基金單位末期分派75.38仙，單位資產淨值35.68元升28.7%。期內物業收入淨額升10.3%至46.16億元，經營開支升8.19%，商戶續租率82.7%，整體租用率按年升1.2個百分點至94.1%，平均每月租金升至每呎38.4元。

領匯資產備受低估

以全年每股可供分派1.4646元，同大行估計差唔多，現價39.6元息率回報3.69厘，估計一四年三月止年度升至4厘左右。息升憂慮，加埋REITs近年累積升幅實在唔少，惹來計數沽盤，但以過去六年平均息率4.4厘計，回歸中線會是36元左右。

管理層提出有趣想法，可能出售部分物業，要知領匯資產向有被低估的共識，除非美債息未來兩個月升幅遠超預期，估計在重估的憧憬下跌穿36元唔易，或者去到十二月起步位37.9元左右，等執平貨的可以開始諗諗。

炒國策要眼明手快

風電股昨日成跌市奇葩，龍源電力（00916）升3%、金風科技（02208）上升8%、華電福新（00816）、大唐新能源（01798）及華能新能源（00958）升幅介乎2至3%。有說昨日是「世界環境日」，所以炒起光伏及風電股；又有指大行調高風電股目標價，刺激風電股做好。

但古勝就相信，這不過是停留在魚缸的游資輪流炒作各個板塊之下的現象，尤其是在跌市嘅時候，有國策扶持的新興產業與傳統經濟相關性相對較少。股民跟風炒作相關股份，至緊要眼明手快，盡量走即日鮮，以控制風險。

古勝