董事長細佬或入局
雷士今個月二十一日舉行股東會，將會喺股東會畀股東投票嘅議案，喺四月尾已經出咗，公司尋日再出通告，話其中一位股東，推舉依家已做咗CEO嘅吳長江，出任執行董事，另外亦推選雷士董事長王冬雷嘅細佬、大股東德豪潤達照明事業部總經理王冬明做非執董，喺半導體照明行業有近十年經驗嘅吳玲，就獲推舉為獨立非執董。
雷士權鬥一事都擾攘咗好耐，事緣吳長江舊年五月突然辭去所有職務，後尾又出現罷工同經銷商停訂單等事件，到舊年九月吳長江終於「回朝」，做運營委員會負責人，後來佢仲引入德豪潤達做股東，到今年一月終於做番CEO。
余詩韻