每年呢段時間股神巴菲特都會搞個慈善午餐拍賣，今年都唔例外，競投時間由二號到七號夜晚，出價最高者可以帶埋七位朋友喺紐約嘅Smith & Wollensky餐廳食lunch，真係諗起都興奮！絲絲尋晚十一點上eBay睇過，出價已經超過70萬美元喇，唔通今年嘅成交價真係可以連續四年創新高？
曾經喺○七年以近65萬美元贏出拍賣嘅Mohnish Pabrai就估計，今年即使成交價穿400萬美元（約3,120萬港元）都唔會覺得出奇，因為同82歲嘅巴菲特共進午餐嘅機會已經買少見少。舊年拍賣最後嘅成交價高達346萬美元（約2,698.8萬港元），據知喺最後一分鐘出價幾乎升咗兩倍，最後成交價比一一年高三成二。其實呢個慈善午餐拍賣已經舉行咗13年，多年嚟已為三藩市嘅Glide Foundation 籌咗超過1,400萬美元。
絲絲計過條數，其實八個人share餐飯錢，即使真係被講中成交價會突破400萬美元，都仲抵過上個月拍賣同蘋果公司行政總裁Tim Cook飲咖啡，索價61萬美元，話晒今次係食餐飯，斷估點都會長過飲杯咖啡啩！
再者，學Pabrai話齋，同巴菲特食飯感覺，就好似同富蘭克林或者愛因斯坦呢啲驚世歷史人物同台進餐咁，幾咁奇妙！絲絲如果有錢，真係好想bid埋一份呀！
余詩韻