絲絲講場：時計寶發憤唔做「潛水錶」
今年初掛牌嘅時計寶（02033）業務係整錶賣錶，公司個股價一直都表現麻麻，至今累跌咗三成幾，有啲人好衰咁形容佢哋係「潛水錶」，主席董觀明發牢騷話，除咗成日有投資者問點解會咁之外，就連佢去到街市買餸都畀人話，搞到好多時都面懵懵咁走。
搞好品牌要多兩年
聽佢咁講又真係幾尷尬，佢好認真咁話，思前想後都真係唔知點解股價會咁樣，明明公司業務Keep住正增長，唔似得有啲零售股咁出現倒退，不過講到底佢話自己都係重視業務多啲，仲希望大家可以畀多兩年時間佢，做好公司個品牌，對業務前景好有信心喎！
搵天王代言「天王錶」
董生一講到發展大計就開心番，話自己最近忙於「選秀」，希望搵到天王級代言人去襯番「天王錶」個品牌，但到依家未有啱心水嘅，仲話宣傳品牌上會「不惜工本」，不過都會控制喺佔銷售額3%至4%嘅水平。
佢透露，今年以來業務增長合乎預期，但整體零售環境麻麻，所以增幅冇以往咁勁。不過講到依家內地倡廉，時計寶相對受影響輕微啲，因為佢哋以中低價產品為主，依家仲搞埋網購，吸引年輕人市場添。
余詩韻