Market Insight：網遊股 小注怡情

美股雖升，奈何港股選擇性跟A股行，恒指得3點進帳收報22,285點，成交跌到五日新低，主板得548億元。美債息回落，近期擔心息升，被人隊低的房託基金醒神番晒，恒生房地產基金指數升2%，8隻REITs反彈幅度介乎0.7至3.2%，領匯（00823）低過40元，預期息率升番上4厘左右，已經開始有番些少吸引力。不過，假如新債王Jeffrey Gundlach預言無錯，美債息今浪高位要見2.4厘，咁似乎又唔使咁急撈底。

到底係咪投行生意真係差，抑或分析員已經淪為對沖基金打手，近期唔少大行報告，都流行掉轉玩，再唔鍾意發掘潛質股向客戶推介，反而狙擊一堆強勢股，搵出弱點齊齊沽低搵食。

古勝冇點你

萬里長空

基金股已今非昔比

在個多月內，先是傳發改委減電價令電力股被洗到開巷，跟住家電無補貼，退市陰霾隊房託，近日有紙股邀請分析員睇廠，隨即被群起而攻之。

維達國際（03331）在幾間大行唱淡毛利率未見底，一日半時間（因昨日玩半日已拉閘）隊低一成三，收報8.71元。對手恒安（01044）有紙尿片生意頂住，唔係獨沽一味受廁紙毛利壓力衝擊，兩日加埋都要跌6.7%。講到底，近期港股真係無乜新錢流入，基金塘水滾塘魚，換起貨上嚟，真係好易誤中副車，基金股已經無以前咁安全，尤其outperformer一個走避不及，坐番一年半載艇都未必可返家鄉。

日本媒體報道，聯想（00992）計劃同NEC合組公司發展智能手機，消息刺激聯想升3.3%，收報8.08元。記得三月先睇過段報道，話NEC因為虧損情況打算退出手機生意，假如消息屬實，同當年法國Alcatel自己搞唔掂，索性賣畀內地公司攞番筆一模一樣。

高端手機壟斷已成

近年高端智能手機技術屏障愈來愈高，軟、硬件由谷歌、蘋果公司及三星壟斷。研究機構Gartner嘅數據顯示，全球智能手機五大巨頭，市佔率分別係三星32%、蘋果公司15.5%、Sony5.1%、HTC4.8%及RIMM4.2%，排在後面四成的已經賺唔到錢，強如台灣HTC，近年被三星打到體無完膚，股價只及一一年高峰期23%。看來，進軍中高端手機重點係提供炒作賣點，等市場聚焦順利由個人電腦的明日黃花，轉到智能通訊設備上面。

中國經濟短期缺乏亮點，意想唔到係跑出一堆中國科網股，熱門如騰訊（00700）、金山軟件（03888），就連網龍（00777）及A8電媒（00800）閒閒哋成交都過億元。

供應網上及手機音樂程式的A8，去年業績見紅之後，連中資券商都唔敢亂估幾時業績逆轉，反而網龍首季業績唔錯，賺1.12億元人仔升近一倍，主要是網上遊戲收入帶動。網龍同騰訊當然無得揮，但市場睇中阿里巴巴集團重組後再上市，拉動整個行業估值，自問賭性夠重兼唔嫌股價快上快落，或者可以細細注試試。

內房殼股吸引勇者

去年以來，多家內房企業在港買殼，記憶中有招商局地產入主東力實業（00978）、萬科入主萬科置業海外（前稱南聯地產）（01036）、中糧集團入主僑福（00207）、金地入主金地商置（前稱星獅地產）（00535）、重慶申基大股東入主申基國際（前稱光星電子）（02310）、勒泰地產入主至祥置業（00112）、宇業集團入主積華生物（02327），以及大連萬達入主恒力商業（00169）。

其中金地股價自一月初0.46元炒到上同月高位1.1元後回軟，到上月又再捲土重來，昨日高位見1.27元，收報1.24元，升12%，與表現牛皮的指數形成強烈對比。純睇走勢，短線回吐守穩1.1元樓上升勢未完。老表向來以作風豪爽見稱，睇嚟內房殼股呢個概念可以繼續吸引探險者尋寶！

古勝