絲絲講場：友邦謝佩蘭 探路返新工
友邦信託行政總裁謝佩蘭 （Bonnie）即將調職至友邦香港，唔捨得同事之餘，仲話唔捨得司徒拔道個office，佢講笑咁話，九龍係佢嘅「禁區」，而佢偏偏就被派去新蒲崗返工，早幾日專登揸車去試路，以免蕩失路。
調過海坐鎮新蒲崗
喺強積金呢個行頭打拚咗三年嘅Bonnie，將出任友邦香港及澳門嘅市場及業務策略總經理。佢知道有得學新嘢，不知幾雀躍，唯一令佢「頭痕」嘅，莫過於要去新蒲崗office返工！
家住薄扶林嘅佢一向少去九龍，依家仲要揸車去鬼咁隔涉嘅新蒲崗，交通情況係佢最大嘅挑戰咁話喎！
專登揸車試走幾轉
不過，Bonnie早就問晒tips，「返工行紅隧，放工就行東隧」，包無塞車！佢上星期日仲專登揸車，喺薄扶林同新蒲崗之間來回走咗幾轉，測試路面情況，順便預吓時間。有朋友仲醒咗兩大份地圖畀佢，哈哈，其實呢個世界有GPS o架，帶住兩疊紙，咪仲麻煩！
點都好，有人離開，當然有新人上任，今次就由加入咗友邦信託兩年嘅馮裕祺（Steven）接手強積金業務，希望佢會繼續為打工仔fight多啲優惠啦！
余詩韻