短炒王：創科高處未算高
港股半日市跌105點唔多，但唔少股份高台跳水，是否要做走鬼準備？不妨睇埋伯南克聽證會後才決定，始終環球放水，資金要搵出路。
全球最大家用品零售商Home Depot前晚公布首季成績，盈利增長18%，優於預期，加埋昨晚美國公布四月份成屋銷售數據，由三月份的492萬戶增至497萬戶，房產市道正朝復甦之路邁進。
本欄二月推介創科實業（00669）時，曾經話過該股是炒美國復甦的首選，結果美國為退市造勢多時，仲未有任何動作，經濟數據就的確是好過你能想像的，連高盛都睇好已經升咗唔少的標普500指數，話一五年升到2,100點，標指周二收報1,669點，創科就由推介時的16元升到昨日高見20.65元，惟最終跌1.2%，收報19.38元。
Home Depot是創科的一大銷售渠道，佔去年銷售38%。既然平台生意理想，唔使斷估都可以解讀為創科首季業務應有一定得益。花旗對其未來的盈測樂觀，指塑膠、銅、鋼及鋰佔生產成本逾五成，原料價格年來下跌約5至15%，有利毛利率表現，仲話盈利提升之路才剛開始，依家追都唔遲，支持位18元，阻力位23元。
達哥