喺美國掛牌嘅新東方，舊年頭頭碰着黑，先畀美國證交會（SEC）調查，後嚟又畀渾水「惡搞」，今年就唔同晒喇，最近上演嘅電影《中國合伙人》，係以新東方嘅創業史為故事藍圖，上映三日票房過億，但係新東方董事長俞敏洪竟然同呢部電影劃清界線，表示自己無投資電影，仲叫觀眾唔好將電影情節對號入座！
呢部勵志片圍繞包括俞敏洪在內三位創辦人嘅創業之路，事實上，新東方喺美國嘅創業路又真係崎嶇不平，淨係舊年先因為VIE（可變利益實體）結構畀美國證交會（SEC）調查，後嚟又畀渾水「惡搞」，指佢無法及時遞交年報，公司股價一度累跌近七成，幸而最後都一一拆解，挽回評級同股價。
俞敏洪自從知道有電影公司打算改編新東方嘅故事，將其搬上銀幕之後，已經表示反對。佢話：「即使新東方已經經歷咗創業嘅風風雨雨，依家又有啲成就，但喺瞬息萬變嘅商業社會裏面，新東方仍然要努力，而唔係拍電影宣傳自己點樣成功」。
絲絲聽聞導演陳可辛親自send短訊邀請佢去首映禮，不過佢最後都婉拒咗行紅地氈，只係做個小小嘅觀眾。
雖然三人創辦人嘅名字都改咗，但電影描述佢去美國留學簽證被拒、同美國教育考試服務中心打官司、喺紐交所上市等種種都係新東方嘅真實故事，令佢不自覺將自己投射到角色裏面，唔能夠客觀咁評論電影喎！
余詩韻