股神巴菲特向來推崇長跑，前排巴郡周年股東大會就特別新加咗一個項目——5公里跑步競賽，有2,000個巴郡股東齊齊落場跑步，場面都真係幾熱鬧o架。
巴菲特仲大讚公司好多董事都係跑步健將，而佢兩位投資總監兼熱門接班人一樣好跑得，韋施勒馬拉松最好成績係3小時1分鐘，專長三項鐵人賽嘅庫姆斯今次比賽成績就係22分鐘。
絲絲估唔到巴郡入面有咁多長跑界嘅臥虎藏龍，作為巴郡企業文化一部分，長跑同投資又有咩關係呢？
長跑唔似短跑追求爆發力，又唔似得足球籃球咁花樣動作多，幾個鐘頭嘅馬拉松比賽，其實最講求跑手識得長時間分配體力，過程基本上都比較悶，但其實聽落同巴菲特嘅長線投資哲學都有啲異曲同工之妙。
巴菲特由八八年起投資可口可樂，股價去到九七年上漲十倍，但九八年至○九年又跌咗30%，佢都一直跟可口可樂一齊跑呢場馬拉松，就唔係人人都咁有耐力喇。
講開又講，巴菲特嗰日着晒全套黑色運動裝，好醒神o架，搞到絲絲勁期待82歲嘅佢會落場跑番兩圈，點知佢笑笑口話今年未準備好，所以淨係負責開起步槍！
余詩韻