港交所（00388）主席周松崗六十年代留學美國，同好多「香港仔」一樣都要自己養自己，冇工做就隨時要停學。佢記得其中有一份工作，好反映到當時美國嘅經濟實力。
有一年佢去咗一間汽車廠做，喺一條生產線上，佢嘅角色係幫架車入六粒螺絲，工作聽落好簡單，但由於生產線係流水作業，如果自己手腳慢，又或者有乜差池，會影響其他工序。Foreman（工頭）同佢講，做唔掂就嗰粒紅掣啦！
周松崗記得，有一次真係做唔切，佢聽晒工頭嘅話，快快手緊急掣停咗成條生產線，點知出事，好似咗火警鐘一樣咁大件事。呢頭完，嗰頭就有四名大漢衝埋嚟，其中一個係工頭，第二個係工頭嘅上司。
周松崗當時畀工頭用粗口「問候」，工頭亦都畀佢嘅上司「問候」一番。而另外兩個大漢就係工會嘅人，佢哋嘅責任就係問周松崗有冇事，同埋需唔需要工會為佢爭取權益。
自此之後，周松崗寧願入唔切啲螺絲，都唔敢再掂個緊急掣喇。佢笑住話，美國嘅汽車工業曾經光輝過，之後畀日本打低，可能係同質素有關，唔知係咪佢寧願入唔切啲螺絲就算數，影響咗啲美國車質素呢？其實周松崗都係開吓玩笑啫，佢做嘢咁認真，點會求其過關呢。
余詩韻