Market Insight：券商股有望轉勢

昨日有日本央行開會，投票九比零通過維持寬鬆政策，央行仲對經濟展望睇法樂觀，事實有安倍經濟學加埋黑田直升機，日本首季經濟增長達3.5%，勁過晒G7任何一個成員，叻過區內南韓及台灣市場，日股創五年半新高，日經指數收市升246點報15,627點。

黑雨警告下港股只得半日市，恒指昨下跌105點收報23,162點，主板成交524億元，雖然尾數26億元是來自新掛牌的銀河證券（06881），但以三小時成交計算，都已經算相當唔錯。短期睇嚟美、日要搣甩印鈔鋪癮唔易，股市又非常勁buy呢一套，認定印銀紙能夠解決所有經濟問題，日股自去年十一月中至今，半年多時間累積八成一升幅。

古勝冇點你 23/05/2013

萬里長空

港股後市仍可看好

睇番美銀美林份資金流報告，上星期日本股市錄得68億美元淨流入，係該行有紀錄以來最勁，環球基金淨流入股票市場達141億美元，係十五個星期以來最勁，今年美國及日本股市兩隻「吸水大笨象」，經已累積吸入499.2億及254億美元游資，或者包括香港以外其他市場，會因為資金分流，升得無美日股市咁勁，不過要包拗頸同個牛市鬥氣，確實係不識時務。

走勢上，港股在一○年底至一一年初在22,123至24,988點形成密集蟹貨區，今年二月嘗試突破無功而還，不過隨住內地經濟及股市可能在上半年見底逐漸回升下，港股後市應該可以睇高一線。

曲線投資A股選擇

銀證首日走勢唔錯，一句到尾，係定價定得夠低，造就皆大歡喜的結局。保薦人最後以每股5.3元上市，介乎最先招股價範圍4.99至6.77元的下限，約1.28倍市帳率，比已經上市的中信証券（06030）及海通證券（06837）的1.69倍及1.41倍平，總算留咗水位畀基金及散戶炒落後。

值得留意是，五月初至今陸續見大行調低中國經濟增長預測，集中在7.5至7.7%，但見對A股及中資股負面影響似有還無，若非二月至今的跌浪已充分反映第一、二季復甦比預期疲弱的因素，就係股市投票機械已預視第三、四季會有穩定的復甦出現，加上憧憬樓市唔會進一步推出調控措施，以及刺激經濟方案會陸續在未來一季登場，相信A股已經找到中短期一個重要支持。

查實畀溢價買幾隻A股ETF之外，券商股是相當緊貼A股氣氛的曲線選擇。加上一二年業績基數奇低，未來兩季如無意外都會見到盈喜，古勝向來貪平，較傾向海通，唔知啱唔啱看官心水。

靜待潤電終極一跌

近期資金由領先板塊轉到炒落後，家電股及電力股慘遭開刀，發改委話要進一步降低農產品生產流通環節電價，以紓解相關行業成本壓力。另一根稻草係有大行分析員估計，因為煤價回落，內地第三季可能減電價0.8仙人民幣，相當於2%減幅，結果短短三日，華能國際（00902）高低位差19.3%，大唐發電（00991）累跌17.4%，連早前因為合併消息已經隊咗一浸的華潤電力（00836），都隊多13.7%。

　先唔提仲有唔少未上市火電電廠，盤數先啱啱唔使見紅，全國減電費機會唔係咁大，以每減1%電價大約等於減少5至10%盈利計，係搵藉口隊抑或真係淡成咁，大家可以自行判斷。古勝都係等緊潤電六月股東大會前終極一跌，博佢合併不成後呈報復式反彈。

古勝