絲絲每年都好期待嘅對沖基金搏擊比賽（Hedge Fund Fight Nite）喺五月尾舉行喇，今年似乎仲有啲驚喜添！
講起拳擊，絲絲同一班姊妹第一時間就諗起一班高大威猛嘅外籍男士；不過今年終於打破呢個「壟斷」，首度有兩位亞洲選手參賽，佢哋分別係Michael Page顧問Jimmy Heng，同Robert Walters International顧問Ronald Ho。
大家唔好以為拳擊一定係年輕人嘅運動，今屆年紀最大嘅參賽者Jorge Marreo已經超過四十歲，對於打擂台十分雀躍。不過絲絲都有啲替佢擔心，事關佢嘅對手比佢年輕十年有多，而且仲係嚟自四連霸嘅長勝將軍滙控（00005）添！
其實呢項金融界盛事由○七年開始舉辦，到今年已經係第七屆喇。以往賽事都會喺十月進行，不過今年就提早咗少少，而且48名報名人士已經被篩選，最後18強參賽者將會喺擂台上決一死戰。