究竟同蘋果公司CEO庫克飲杯咖啡要幾錢？經過連日嚟86次嘅網上競投後，終於以61萬美元（約476萬港元）成交！呢個價錢比慈善拍賣網站Charitybuzz.com所估計嘅5萬美元，足足超出十二倍呀！
絲絲就八卦到，呢一位善長仁翁唔願意公開自己嘅姓名同背景，唯一肯定嘅係佢實係庫克嘅粉絲。因為佢將會去到位於加州嘅蘋果公司總部同庫克飲咖啡，不過時間就只得30分鐘至1個鐘，而行程嘅住宿同埋機票都要自己畀！但就可以帶多一個朋友一齊去。
至於今次所籌得嘅善款，將會全部捐畀一個叫甘迺迪司法與人權中心嘅組織。
余詩韻