萬呎舖面對正H&M
絲絲聽講，嚟緊喺中環開幕嘅TOPSHOP，舖面面積有成14,000平方呎，仲係大中華區第一間旗艦店！佢哋仲強調，每個星期都會有300件貨品到港。而絲絲最期待嘅，就係TOPSHOP為客人提供嘅「個人購物」服務，會幫客人提供形象指導！連佢哋老闆格林（Philip Green）都話，有信心可以吸引到一眾嘅潮男潮女去掃貨咁話！
絲絲另有一個最興奮嘅地方，就係TOPSHOP將會開喺中環皇后大道中59至65號嘅泛海大廈。事關呢個地址就正正喺H&M嘅對面，以後絲絲睇衫可以一次過逛晒兩間舖，簡直係一石二鳥呀！當然TOPSHOP同H&M就唔係咁諗！
余詩韻