網上購物異常普及，作為內地數一數二嘅家電銷售商國美電器（00493）總裁王俊洲就同絲絲講，自己每日都會密切上網觀察國美電子商務嘅運作情況，因為聽人講都唔夠自己親身體會咁深刻，仲話要經營呢個行業單靠第三方監測絕對唔足夠，最重要係自己落手落腳去做。
內地網購商機龐大，早已成為各家電子商務經營者嘅兵家必爭之地，每年嘅十一月十一日「光棍節」更加係大家爭取銷售額嘅主戰場。面對各大競爭對手層出不窮嘅推廣減價招數，王俊洲話每日除咗會睇住公司電子商務嘅成交狀況、客戶流量同埋銷售情況之外，主要競爭對手嘅電商業務情況亦都會留意埋，俗語話「知己知彼」嘛，梗係要睇實同行嘅情況啦！
國美電子商務嘅產品種類愈嚟愈多元化，王俊洲話好重視電商嘅競爭力同埋方便程度，商品價格、布局、豐富度係咪方便客戶選購，仲會睇埋上網速度係咪夠快。早前國美曾經公開講過，未來會將電子商務定為發展重點之一，今年戰略亦會由去年嘅價格戰，轉向盈利主導。唔怪之得王總身體力行，可見國美對電子商貿嘅重視程度有幾高啦！
余詩韻