Market Insight：銷售達標車股開動
在美國聯儲局屬於鷹派一方的費城聯儲銀行行長普洛塞，於隔晚一段演說中提到，美國就業數據及薪金都有穩定改善，如果聯儲局下個月唔立即開始提出削減買債規模（即係退市），最終將要賠上信譽。
普洛塞已經唔係第一次出口術，游說聯儲局其他鴿派成員要考慮退市，意外係美股完全當佢無到。隔晚道指再創歷史新高，升123點報15,215點。美國失業率由○九年最壞時10%，落番嚟7.5%，同聯儲局主席伯南克提出退市觸發點6.5%收窄到得「溫巴仙」，其實段估都應該有小小怯。
偏偏「上帝要你滅亡必先令人瘋狂」，唔知係華爾街狂牛想趁QE真正退出前炒到爆，抑或真係憧憬經濟復甦力量，會勁得過量寬對股市的好處？近期美股完全漠視負面消息，幾乎日日升，牛三味道濃到極。雖然好炒兼容易搵錢，但勸有玩開美股的讀者們，要預咗一旦掉頭，要輸番一大截出去，千祈唔好貪勝不知輸，愈升愈賭得大。
港股成交尚未配合
美股創新高，昨日港股重上兩萬三點樓上，恒指升113點報23,044點，始終唔係環球大孖沙熱炒的市場，主板成交奀到得548億元。大行要長期咬住一隻晒士有番咁上下的股票去唱淡，較為罕見，分析員得罪公司高管兼且好大機會無晒融資批股生意，單為年終ranking未必會咁做。
不過，更罕有係長期唱淡後改口，近三年因為睇淡利豐（00494）響晒朵的瑞銀分析員梁裕昌，昨日出報告將評級由沽售轉到中性。
大淡友轉性，令到利豐股價勁升8.3%見11.16元，拋離被調高後9.5元目標價一成七。古勝昨日搵番份報告嚟睇，內容查實仲係口淡淡，話利豐估值被下調的趨勢會持續，將評級調整純粹因為年初至報告面世前股價大跌三成，跑輸恒指太多。睇落想追勢嘅，真係博唔過。
電動車鼻祖見曙光
比亞迪（01211）昨升4%報33.25元，中段見過33.95元的兩年新高，一來係45部比亞迪E6電動的士正式「攻港」，另股神巴菲特周一訪華，接受央視訪問話無意沽售比亞迪，也成為炒作原因。
講開電動車，唔能夠唔提電動車鼻祖，基地位於矽谷的Tesla（美股代碼：TSLA），佢電池管理技術，供應全球幾間主要有生產混燃及純電動車車廠，早輪自己生產的電動超跑房車Model S，來港畀人試車兼預訂，在下有幸試過，立即心動起上嚟，無奈喺香港搵叉電唔係咁易，不過由外形與性能，同E6拍埋真係贏好幾條街（唔信不妨Google一下）。
早幾日Tesla公布季績，史上第一次虧轉賺，股價一星期內由58美元挾到97美元，計落急升後，市值97億美元或者750億港元，居然仲細隻過總市值987億元的比亞迪，如果要鬥電動車應用技術及商業價值，一係兩隻都買，即使Tesla有排都未全面賺錢，但故事定較比亞迪動聽得多。
近排幾隻汽車股，在四月銷售數字公布後，普遍都有唔錯表現，長城汽車（02333）四個月累積完成全年目標36%，吉利汽車（00175）完成33%，華晨（01114）完成34%，東風集團（00489）則完成27%。除了東風受日系的東風日產及東風本田銷量較弱拖累外，大部分都超過全年銷售目標三分之一。
吉汽4元具吸引力
吉汽因為兩款SUV（多用途車）GX7及SX7車款，暫時僅達銷售目標兩成，抵銷了其他經濟型車款的強勁增幅，不過，近兩日股價穿一穿4元後，好快就搵到支持，昨日拗腰上返去4.07元，上升3.3%。
睇番大行報告，對吉汽SUV銷情未達預期都有唔少正面睇法，認為無減價促銷保住首季毛利率，尤其上個月上海車展時，大眾推新款桑塔納及捷進打低階市場，今年一心以SUV改善產品結構的吉汽，反而被睇好下半年會有表現，一三年10.7倍PE，以今年兩成三增長，睇嚟4元水平仲係買得過。
古勝