絲絲講場：法國徵iTax捍衞本土文化
自從呢幾年智能手機熱到爆之後，絲絲都少咗入戲院睇戲，因為智能手機同互聯網已經可以提供好多娛樂。不過，法國政府似乎唔多鍾意呢啲智能產品，最近就提出要針對所有可以上網嘅設備，徵收最多4%嘅iTax。最快會喺下個財政年度公布徵稅安排。
為咗喺現今急速嘅數碼時代保護法國獨有嘅本土文化，法國著名記者兼企業家Pierre Lescure就向總統奧朗德提議，向所有智能手機、平板電腦等網絡兼容設備徵收銷售稅。佢解釋，因為呢啲產品會削弱消費者買CD或者入戲院睇戲嘅意欲，變相影響文化產業嘅發展，所以要收稅幫補番。
稅率唔高 防堵黑市
其實法國一向都好保護本土文化，除咗今次嘅iTax之外，一路以嚟法國都有一個稅務系統向電視台同其他廣播機構徵稅，旨在要幫吓法國嘅本土電影製作。
不過，法國嘅智能手機擁躉唔使擔心住，因為文化部長菲利佩蒂表示，政府唔係想借iTax懲罰消費者，更加唔想有黑市貨出現，所以iTax嘅稅率唔會太高。佢話iTax稅率開始會訂喺1%水平，估計已經可以徵收到8,600萬歐元嘅稅款，之後先會再考慮提高至3到4%。無論點都好，今次奧朗德開徵iTax，絲絲覺得點都有理據過徵收富人稅啩！
余詩韻