Market Insight：貨幣貶值有利炒作

昨日恒指下跌59點報22,930點，全日波幅幾乎上晝行了大半，午後幾十點上落，塘水滾塘魚格局。淡友靜靜起革命，沽空佔大市成交比例，升到11.18%的近一個月高位。

昨日西班牙拍賣30.3億歐元一年期債券，三年來首次低於1厘拍板，連四個人有一個失緊業的歐豬大債仔西班牙都得！證明成個金融系統，在美歐日澳韓都齊齊話要放水，根本唔缺錢，只不過係大孖沙極為揀飲擇食，唔吼受阿爺收緊水影響的中港股市。

收息度日求保本

昨日中信泰富（00267）發行永續次級債券，初步指引息率為9厘，聽番私人銀行賓架話嘅反應相當理想，今時今日特區政府唔畀人炒樓，股市又畀唔到人信心，唔少有銀之士都搵這類低評級高息企業債券泊住先，好息之徒至愛的幾隻本地REITs幾乎日日創新高，個個想收息度日唔敢搏命，其實真係唔多健康，或許，中港股市正需要中國經濟復甦轉強，令整個形勢逆轉的一根稻草。

古勝冇點你15/05/2013

萬里長空

可惜係，一至四月內地固定投資增長20.6%，增速比首季進一步放緩，製造業投資增長有同樣情況，內地產能過剩問題嚴重，地方債務過高，限制提升稅收能力，四月份全國財政收入增長得6.1%，遠低於同期支出增長18%。中央進一步擴大基建投資提振經濟的空間受到限制，形勢比人強，睇怕人民銀行遲早都係要跟大氣候減息。

貨幣戰爭下，多國央行或減息或量寬，連鎖反應是壓低本國匯價。日圓由年初86水平，輾轉跌到四年低位見102.15，澳洲紙更誇張，短短兩三個星期由接近1.04水平跌到落0.99，貶值近5%。對於部分以日圓或澳元採購，銷售則以美元同港元結算的上市公司有利，最佳例子有賣零食的阿信屋控股公司CEC國際（00759），或者有半數零部件由日本採購的精電（00710），年初至今股價升幅驚人。

大昌行估值唔貴

一月時，提出要睇實一堆受惠圓匯貶值的股份，可惜當時想法太正路，揀代理大量日本品牌汽車的大昌行（01828），年初至今股價仲要跌10.8%，走勢真係落後到暈。今日睇番死因，古勝實在低估中日關係緊張，對內地日本汽車銷售影響的持久力。不過，大部分投資者放大了交還賓利房車在內地經銷權予廠方的影響，反而無視新增城市代理權，以及新開4S店抵銷有關短期影響的部署。

近期，大昌行股價跌到7元附近有跌唔落的迹象，估計一二年業績已經見底，或者八月公布的中期業績，毛利下跌壓力仍然存在，惟起碼仲有近三個月可以炒。

近期受惠於圓匯貶值的公司股價升得八八九九，相信遲早都輪到大昌行，或者怕中期業績有乜冬瓜豆腐，炒一兩個月就可以先避一避，但見口淡淡的分析員最差都只係預測大昌行一三年賺11億元左右，計落11倍左右嘅市盈率，就真係唔貴，現價應是贏面大，輸面相對細的入市時機。

聯想撈貨睇定啲

繼昆侖能源（00135）染藍後股價便告別高位，聯想集團（00992）又成為另一案例。回顧今年三月初進身藍籌股行列的聯想，股價自三月一日見高位9.07元後便反覆回落，上月見低位6.45元，之後曾嘗試收復250日線，可惜在缺乏利好消息支持再度失守牛熊分界線，昨日低位見6.63元，短線一旦失守保力加通道底部6.6元，不用心急撈底，等下試6至6.2元水平承接再睇都未遲！

古勝