絲絲講場：郭炳江一百分愛孫
新地（00016）好鍾意搞藝術活動，贊助香港藝術節主辦嘅「創藝童樂樂」計劃，新地主席兼董事總經理郭炳江難得一臉童真，佢同絲絲講，見到班小朋友，令佢諗起自己個孫，仲話小朋友都好享受藝術節表演，以後佢都會多啲帶自己啲孫去藝術活動，培養吓佢哋嘅藝術氣質喎。
呢個活動喺新地地標建築物天際100觀景台搞啟動禮同藝術講座，由郭炳江同香港藝術節協會主席夏佳理主持，在場小朋友有近100個。
夏佳理容光煥發
夏佳理自從退任港交所（00388）主席後就曝光率大降，不過可能無以前咁辛苦，絲絲見佢精神好似仲好咗，佢話香港藝術節已經有41年歷史，未來係須要培育年輕一代對藝術嘅興趣同認識，所以同新地合作，搞呢個全新嘅藝術教育計劃。
呢個「創藝童樂樂」計劃分四個部分，早前請偏遠地區或基層家庭兒童欣賞今年香港藝術節嘅國際演出，未來會邀請本地藝術家主持巡迴藝術教育講座，派發創意品牌Chocolate Rain插畫教材畀參與小學等。