大型投行不時會搞吓投資年會，畀旗下嘅企業客戶及機構投資者見面吹吓水，等第日企業有需要度水時，投行Call基金圍飛都唔使花咁多口水。
大摩下周一至四一連四天就喺香港搞迷你投資年會，據講百多位中資企業嘅投資關係（IR）要員現身，以及逾千名基金人士出席，話就話係迷你投資年會，睇人數，規模唔算細。
其實大摩喺新加坡搞嘅亞太區投資年會規模仲大，要租5星級酒店，嚟嘅都係區內大型企業客戶，反而中資客唔係咁多，當然喺內地搞會更方便客戶，但因為唔少內企嘅IR都駐香港，加埋大型基金一般喺本港落腳，所以大摩亦從善如流，係自己辦公大樓開大會。
據絲絲老友講開，逾百家內企中，五分一嚟自內房，除咗龍頭中國海外發展（00688），幾乎所有上市內房都有代表出席，當然客戶親疏有別，尊貴客戶會安排同大基金單獨講心，優越客戶會搞Group簡報，總之投行喺年會點都要show下本身嘅價值。