日本首相安倍晉三嘅「三箭頭」振興經濟計劃，有個專有名詞叫Abenomics，成唔成功仲有排驗證，但安倍特別受女性推崇，就證實到喇。早前有日本女仔着晒短裙仔，力撐「迷你裙愈短，日經指數愈高」嘅傳說，尋日就連內衣品牌黛安芬，話今年推出嘅概念Bra名為「安倍經濟學Bra」（Branomics Bra），以支持安倍晉三嘅「三箭頭」振興經濟計劃！
黛安芬嘅概念Bra活動其實已經舉行咗25年，係每年公司宣傳嘅重頭戲之一。過往都有推出過「太陽能Bra」、「回收環保Bra」、「狩獵老公Bra」等，不過全部都只係以概念形式展示，齋睇無得買。
今年適逢日本經濟大改革，黛安芬特別設計呢款有上升箭嘴樣式嘅Bra，仲承諾可以透過「加墊」，令Cup數尺寸加大2%，以配合安倍計劃兩年內通脹達2%嘅目標。
公司發言人仲表示，隨住日本經濟增長，罩杯Cup數都會跟着變大！雖然絲絲聽完都唔明個活動可以點刺激到日本經濟，不過國民間有呢份支持嘅心都係好嘅！睇嚟Economics呢個字嚟緊都會喺日本大玩特玩，唔知下一次又會有咩產品力撐經濟呢？