渣打集團（02888）尋日公布嘅季績，只可以用「麻麻哋」嚟形容，同日召開嘅股東周年大會，氣氛就可以用「曳曳哋」嚟形容喇，一班小股東好似儲埋咗好多怨氣，一併爆出嚟，好明顯最不滿嘅係集團捲入洗黑錢案及高層監管不力，成場股東會火藥味好重，睇嚟佢哋真係要飲番杯涼茶下吓火喇！
洗黑錢案累集團賠錢兼聲譽受損，管理層都知衰，一開波已經「沙晒冧」，話集團唔會再犯同樣錯誤，但小股東就似乎唔多收貨，不斷追問之後點樣可以避免事件再發生。有位股東仲好勞氣話，成20人嘅董事會，平時嘅人工、出trip使咗咁多錢，舊年仲飛咗去非洲開會，但係就唔知做咗啲乜。
至於做咗渣打好多年核數師嘅畢馬威亦成為被插對象，小股東質疑點解連洗錢咁大件事都睇唔到，之後仲要繼續幫襯佢，集團主席莊貝思就幫口解圍啦，但呢排曾經失言嘅佢，幫到人就好似幫唔自己喇！
有小股東問問題問到去西非，自言四十幾年前已經喺西非有渣打嘅戶口，但就發覺渣打近幾年喺西非嘅分行好似少咗，莊貝思就話其實渣打一直都好重視西非市場，對嗰度嘅重要性就好似係嗰度嘅央行咁。唉，莊貝思咁答，嗰個小股東梗係食住上，寸佢咁渣打又係唔係英國嘅央行？
渣打以往嘅成績表好好，好少股東咁勞氣，今回洗黑錢事件真係對渣打好傷，惟有寄望佢哋做好間銀行，氹番班小股東喇！
余詩韻