Market Insight：電訊設備股 收益有保證

唔少市場人士曾經質疑內地經濟數據真確性，古勝對統計學真係半桶水，無資格批評，但見大行對四月中國出口增長預測，平均估計由三月10%跌落9.2%，最後出嚟，數字居然不跌反升，增長14.7%，接近六成誤差，錯成咁，睇怕除財爺每年份預算案外，大孖沙之中確係無出其右。

數據公布後，人民幣兌美元再創匯改新高，去到6.1401，滬綜指升10點報2,246點，升穿四月中旬2,250點高位，技術上扭轉二月初開始一浪低於一浪的調整形勢，估計短期好可能彈多一浸，試2,288至2,344點之間阻力。

古勝冇點你09/05/2013

萬里長空

大戶都有羊群心態

早排話家電股今年跑贏中字派股份幾條街，轉頭已經比芬佬懲戒，內地引述中國家用電器協會高層言論，話五月底內地五大類家電補貼期屆滿後，暫時仲未有着落。報道曝光，三隻家電股TCL多媒體（01070）、海信科龍（00921）及創維數碼（00751），昨日畀大孖沙隊到跌4.2至12.2%。

查實中央提供的補貼，去年六月開始到今年五月底屆滿，是路人皆見，今年五一假期期間，內地新聞已經話家電零售商做到無停手，消費者趁補貼屆滿前掃雪櫃、洗衣機及電視機，莫非芬佬仲比班消費者仲後知後覺，昨日至知下個月無平家電買？

講到底，幾隻家電股今年累積升幅唔少，股價無可能長期反地心吸力，睇番三隻股票收市價，相當於將今年累積升幅跌番37.3%、12.6%及47.7%出去，創維的確插得較兇殘，君可見早前提過大落後的海爾電器（01169），基本上無乜跌，昨日仲有2.1%進帳，但今次咁隊法，可見大戶直頭同散戶一樣，羊群心態人買我買，人沽我沽之外，仲愈炒愈短線。

蒙牛收購唔益「牧民」

以前有個廣告話，要飲奶唔需要自己養牛牛，不過，內地食物安全，搞來搞去都無辦法令消費者有丁點兒信心，自建奶源穩定供貨品質，已經係一眾奶粉到乳業股揀無可揀的出路，成本效益已經非他們考驗範圍。蒙牛乳業（02319）確認傳聞，以每股作價2.45元收購合共12.96億股現代牧業（01117），交易相當於已發行股本26.92%，交易後持股權量由1.078%增至27.99%，成為單一最大股東。

現代牧業一直是蒙牛主要原奶供應商，在全國運營22個大型奶牛牧場，股價昨急跌6.4%收報2.61元，毫無疑問，交易規模未去到35%全面收購觸發點，坐定貨等的股民真係要投降收場！以每股2.45元計，相當於今年預期市盈率大約19.2倍，唔算平，接近蒙牛本身的19倍，對每股盈利影響應該有限，最後消費者會唔會真係信心大咗飲多啲，看來只能等時間證明。

瑞聲訂單取得平衡

主攻手機及平板電腦微型喇叭的瑞聲科技（02018），份季績beat到分析員預期，賺5.34億元人仔，按年升七成，股價昨創39.7元歷史新高，收報39.05元。

今次份季績比綜合大行預測的4.87億元人仔多近一成，顯然，市傳瑞聲的大客之一蘋果公司的iPhone及iPad出貨量唔及預期的衝擊，被其他客戶訂單抵銷，公司亦特別提到首季來自南韓客戶（畫公仔幾乎畫出腸）佔收入比重升至雙位數，最近蘋果公司季績一般，反之三星盈利卻創新高，相信公司已「成功」平衡主要客戶訂單的變化，就像當年摩托羅拉訂單沒落，iPhone乘勢而起一樣。

根據過往嘅紀錄，第一、二季屬淡季，與大型電訊設備商及電子消費品在多集中在下半年，趁感恩節及聖誕前出新款有關，大行預測全年賺約23.07億元人仔，首季完成23.1%（去年同期只係17.7%），今年三星出「機海戰術」，蘋果公司第三季估計有新iPhone付運，大行短期調高瑞聲全年預測機會頗高，以去年高位大約18倍預期市盈率計，看來股價今浪有機會上試45元左右。

古勝