絲絲講場：內地富豪首要目標保身家
招行同管理諮詢公司聯合發布嘅《2013中國私人財富報告》顯示，上年全國已經有超過70萬人躋身「高淨值」一族，要成為「高淨值」富豪，至少要有超過一千萬人民幣可投資嘅資產，絲絲以為富豪梗係唔會嫌錢多，但報告就話，依家內地富豪最想嘅係以保障財富為首要目標！
搵銀為求優質生活
據報告分析，隨住愈來愈多千萬富翁關注財富保值，佢哋嘅投資心態都開始變得成熟，識得透過跨境資產配置分散投資風險，仲以家族信託方式保障財富，令到跨境多元化配置需求增加。
絲絲仲留意到追求高生活質素已經變成富豪搵錢嘅原動力，因為問卷報告顯示富豪嘅第二目標係維持「高品質生活」，而「子女教育」就排喺第三位。其實唔單止內地，香港唔少父母喺BB未出世前，就已經幫佢搵定playgroup、幼稚園，內地富豪同樣重視小朋友嘅成長教育，一筆豐厚嘅教育基金點少得！報告仲話有三分之一嘅受訪富豪已經開始考慮財富傳承嘅問題！
余詩韻