Market Insight：車股落後買定離手

昨日的沽空佔成交比例第二日企在雙位數，有10%，升跌股份比例61比39，稍稍同周一的69比31回落。二三線股升多跌少情況明顯，因為澳洲昨意外減息，澳元跌穿1.02雙底，亦都令藍籌中澳洲投資比重最高的中信泰富（00267），升2.8%，名列藍籌榜首。

大笨象忽然有驚喜

原諒古勝又再以小人之心，度滙控（00005）之腹。大笨象季績出乎預期咁好，稅前溢利幾近翻一番，由去年同期43.2億美元躍升至84.3億美元，較平均80.4億美元的預期高，股東權益回報14.9%，貼近12至15%目標上限。

古勝冇點你 08/05/2013

萬里長空

儘管今次業績死貓彈，唔少成分來自減值從高峰回落，削減成本得宜，以及「炒房」的環球銀行及資本市場業務收益優於預期等等，不是太高質素及持久的收益來源，但大笨象捧場客也實在饑股太耐，業績一出，滙控股價在倫敦挾升2.8%去到733.6便士，仲幫埋夜期抽上兩萬三樓上。

今日內地公布四月份貿易數據，滬綜指可唔可以升穿2,250點阻力，扭轉一浪低於一浪的走勢，食粥食飯睇今鋪，尤其市場估得都幾悲吓，估計出口由三月的10%增幅收窄到四月9.2%，進口由14.1%跌到13%，另估由貿易逆差8.8億美元，返到有161.5億美元順差。

近期大市愈升成交愈縮，芬佬怕執輸但更驚衝落去摸頂，炒得嚟又要緊慎，結果搵高beta股着數，注碼細咗，但博佢升幅搭夠，不過價位上落，同埋轉手率勁快，唔貼市要跟風上車，絕對係高難度。

首日掛牌的同仁堂國藥（08138），以3.04元招股，昨收報6.53元，一日起個孖，令人對跟住前後腳招股的銀河證券（06881）及中石化煉化（02386）有無限憧憬。

銀證中線應具瞄頭

古勝向來怕玩新股，好嘅抽得少，最怕唔湯唔水（一手黨不在此限）；相反，一旦通街無人要，你借埋孖展搞到一倉都係，隨時賺十次唔夠輸一鋪，論集資規模，估計兩股短炒表現與同仁堂國藥無得揮，不過在下睇好券商股，應該在第二、三季跑贏個市，其中銀證的策略股東又個個天皇巨星，如果有中線持貨打算，銀證應該諗得過。

繼續搵落後股，睇番幾隻正路汽車股其實都幾落後，今年吉利汽車（00175）升11.4%算係比較標青外，華晨汽車（01114）及東風集團（00489）真係升得唔多，得2.3%及2.5%進帳。吉汽較為強勢，估值11倍唔到比較平易近人之外，上半年因為產能樽頸，SUV銷量遜色的情況下半年可望解決，有故仔配合炒作。

至於華晨，賓架驚內地高消費放緩及中央反貪，不利寶馬銷情。不過，管理層已表明唔會將價就市，唔割價促銷之餘，仲訂寶馬全年銷售目標22萬輛升三成，以13倍市盈率計，今明兩年20.5%及28.5%盈利增長預期，10元左右股價其實幾吸引，早前的9元真係有啲沽過龍之嫌。

電力設備股近阻力

至於東風，第一季業績的確令唔少人失望，尤其釣魚島引發的主權爭議，影響比預期長，第一季仲要繼續維持每架車補貼千元人仔，銷售量仍要跌4%（日系跌幅更大）。半杯水故事，可以視為基數低，未來改善空間大，尤其是今年有暢銷新款天籟補上，跌到8.7倍PE亦已平霸同儕，觀感同華晨一樣，以三至六個月為限應該係贏面幾大。

　呢期股市炒風升溫，就連個別估值低迷的中資股板塊亦見起動，就如電力設備股，上周開始上升，昨日東方電氣（01072）再升8%、哈爾濱電氣（01133）升3.8%、上海電氣（02727）升4.4%。不過，呢三隻股尚未擺脫年初以來的下降趨勢，且一直受制於250日線，三者現價均已升近250日線，短線或面臨調整壓力，故高追宜注意風險，建議候整固再作考慮。

古勝